Tam o' the linn cam up the gait,
Wi' twenty puddings on a plate,
And every pudding had a pin,
"We'll eat them a'," quo' Tam o' the linn.

Tam o' the linn had nae breeks to wear,
He coft him a sheep's-skin to make him a pair,
The fleshy side out, the woolly side in,
"It's fine summer cleeding," quo' Tam o' the linn.

Tam o' the linn, he had three bairns,
They fell in the fire, in each other's arms;
"Oh," quo' the boonmost, "I've got a het skin;"
"It's hetter below," quo' Tam o' the linn.

Tam o' the linn gaed to the moss,
To seek a stable to his horse;
The moss was open, and Tam fell in,
"I've stabled mysel'," quo' Tam o' the linn.

2.
Tam o' Lin's daughter scho sat on the stair,
And, "wow," quo scho, "Father, am na I fair?
There's mony ane wed wi an unwhiter skin."
"The deil whorl't aff," quo Tam o' the Lin.

Tam o' Lin's daughter scho sat on the brig,
And, "wow," quo scho, "Father, am na I trig?"
The brig it brak, and she tummel'd in--
"Your tocher's paid," quo Tam o' the Lin.

3.
Tam o' the Linn was a Scotsman born,
   Fa la linkum, feedledum.
He had a cap of a hunter's horn.
   Fa la linkum, feedledum.

The wrong side out, and the right side in,"A very gude cap," quo Tam o' the Linn.
   With my feedledum, &c.

. . . . . . . . . . . . . . . . .

Tam o' the Linn's gaen doon to the moss,
   Fa la, &c.
Seeking a stable to stable his horse,
   Fa la, &c.
The night being mirk, the mare fell in,
"Ye're stall'd for the night," quo Tam o' the Linn.

Tam o' the Linn was no very wise,
   Fa la, &c.
He had three shillings and bought a grice,
   Fa la, &c.
The grice gaed out but she never came in--
"We've lost our grice," quo Tam o' the Linn.

Tam o' the Linn and his wife's mither,
   Fa la, &c.
They fell baith in the fire thegither,
   Fa la, &c.
Tam being undermost gat a brunt skin,
"Take turn about, mither," quo Tam o' the Linn.