Donald McGillivray
Donald's gane up the hill hard and hungry
Donald's cam doon the hill wild and angry
Donald will clear the gowk's nest cleverly
Here's to the King and to Donald McGillivray
Come like a weibach, Donald McGillivray
Come like a weibach, Donald McGillivray
Balance them fair and balance them cleverly
Aff wi' the counterfeit, Donald McGillivray
Donald's run up the hill but his tether, man
As he were wud, or stinged wi' an ether, man
When he comes back there's some will look merrily
Here's to King James and to Donald McGillivray
Come like a weaver, Donald McGillivray
Come like a weaver, Donald McGillivray
Pack on your back an elward sae cleverly
Gie them fu' measure, my Donald McGillivray
Donald has foughten wi' reif and roguery
Donald has dinnered wi' banes an' beggary
Better it were for Whigs and Whiggery
Meeting the Devil than Donald McGillivray
Come like a tailor, Donald McGillivray
Come like a tailor, Donald McGillivray
Push about in and out and thimble them cleverly
Here's to King James and to Donald McGillivray
Donald's the caller that brooks no tangledness
Whiggin' and Priggin' and a' newfangledness
They maun be gane -- he winna' be baukit man
He maun hae justice or faith, he'll tak' it, man
Come like a cobbler, Donald McGillivray
Come like a cobbler, Donald McGillivray
Beat them and bore them and handle them cleverly
Up wi' King James and wi' Donald McGillivray
Donald was mumpit wi' mirds and mockery
Donald was blinded wi' blads o' property
Arles ran high but makings were naething, man
Lord how Donald is flying and fretting, man
Come like the Devil, Donald McGillivray
Come like the Devil, Donald McGillivray
Skelp them and scaud them that proud sae unbrotherly
Up wi' King James and wi' Donald McGillivray!
